هو ليه الشباب عايز يهج من البلد ؟؟..

من حوالي سنة او سنة ونصف كده سمع الشباب في قرية البرلس ان هناك مجموعة من الصيادين يمكن انهم يسفروهم إلى اليونان عن طريق مركبهم .مقابل خمسة وعشرين الف جنيه للواحد .

وفي اليوم المنتظر كان فيه ستة وعشرين شاب قدروا يجمعوا المبلغ وركبوا مع الصيادين المركب ..بعد ما المركب مشت حبة في البحر فوجئوا بالصيادين بيعاملوهم معاملة في غاية السوء وحبسوهم في بطن المركب وما كانوش بيأكلوهم إلا من الخبز اللي بيرموه للسمك .



وبعد اسبوعين في عرض البحر قالولهم وصلنا الشاطئ اهو ...الشباب قالوا لهم الشاطئ بعيد اوي قالولهم احنا ما بنعرفش نعوم .الصيادين رموهم بعنف في عرض البحر المهم مات منهم اتنين او تلاتة ..لكن كان فيه مفاجأة في انتظار اللي وصلوا للشاطئ ..انهم ما كانوش في اليونان ...كانوا في العجمي في الأسكندرية .





حادثة مؤسفة فعلا لكن تعالوا نعرف ليه الشباب بتاعنا بيعمل كده ؟؟ ليه الشباب اضطر انه يحط فلوسه وعمره في مهب الريح كده ؟؟









اكيد كان فيهم خريج جامعي فضل سنين وسنين مش لاقي شغل بالشهادة اللي اخدها وداخ واتشحطط وكان آخر امله انه يشتغل في جمع القمامة في شركة اونكس اللي غالبية اللي بيجمعوا القمامة فيها حملة شهادات عليا ومتوسطة .








واكيد كان فيهم اللي كان حلمه انه يشم هوا نظيف ويشوف شوارع نظيفة بعد ما اصبحت شوارعنا مرتع للقمامة والقذارة اللي بقت مشهد مألوف في شوارعنا ( شكل صاحبنا في الصورة الأولانية مش شايف شغله ولا ايه )







كان اكيد طبعا فيهم واحد كان نفسه يطلع عالم او كاتب او فنان لكن ما لقاش اللي يقدره ويحترمه او يساعده ويصرف عليه لأن فلوس البلد كلها رايحة على عمرو سماكة ...على فكرة عمرو سماكة دفع فيه الأهلي اكثر من ثلاثة مليون جنيه مصري ومع كده ما لعبش غير مباريات تعد على صوابع الأيد .





وفيه اللي اتخنقوا ...من حاجات كتير





...فيه اللي اتخنقوا من زحمة المواصلات وكمان حوادث المرور بالمرة اللي وصلت في عام 2002 إلى حوالي 31 الف حادث وبلغت نسبة المحاضر المحررة ضد سيارات في عام 2004 إلى ما يقرب من 25 مليون محضر .





وفيه اللي اتخنق من كتر الناس اللي بيشوفهم بيدوروا على اكل في الزبالة ( هي ايه حكاية الزبالة كترت ليه ؟؟)









مش كله طبعا كان طلبة جامعة ...اكيد كان فيه منهم في طفولته شقيان وتعبان وضاعت عليه طفولته ومش عايز

بقية حياته تضيع بلا ناتج زي ما ضاعت طفولته

على فكرة عمالة الأطفال في مصر وصلت لحد رهيب فبحسب تقرير الجهاز المركزي للأحصاء والتعبئة ان عدد العمال من الأطفال في مصر من سن 6 إلى 14 سنة بلغ مليون وتسعة وثلاثين الف طفل .











وفيه اللي خايف لما يكبر يبقى زي اللي في الصورة من الفقر والبطالة وبرده نقول ان احدث التقارير تقول ان مصر بها حوالي نصف مليون متسول وانها احد اكبر الدول المصدرة للمتسولين في الوطن العربي حيث يتواجد اعداد كبيرة من المصريين يتسولون في السعودية وليبيا وغيرها من الدول العربية







وفيه كمان اللي زهقوا من الشعبطة في الأتوبيس







واكيد فيهم حد مش عايز يتخنق جوه هنا تاني على فكرة الوسيلة اللي حضراتكم شايفينها تعتبر وسيلة التنقل الرئيسية في غالبية المحافظات ولا ينافسها منافس إلا التوك توك وما ادراك ما التوك توك









وفيه اللي انضرب عليه نار وهو بيتظاهر او بيحاول ينتخب ووصل عدد القتلى المصريين في الأنتخابات الأخيرة إلى 16 قتيلا .







وممكن يكون صاحبنا ده كمان كان على المركب بعد ما فتحوله دماغه في مظاهرة ( انتقدت منظمة هيومان رايس ووتش منظمة حقوق الأنسان العالمية العنف في التعامل مع مصر واعتبرتها من الدول التي لا تحترم حقوق الأنسان في تقريرها عن حقوق الأنسان في العالم عام 2005









واكيد ابن الست دي كمان بيفكر يركب مركب ويهرب على ايطاليا ولا اليونان ولا

حتى السودان المهم يخلع على فكرة تقول الأمم المتحدة ان عدد الفقراء في مصر 34 مليون بينما تقول الحكومة المصرية انهم 14 مليون .









??? يلا كفاية عليكم كده ...نقابلكم في اليونان ..او في العجمي بمعنى اصح

3arf leh 3alashan el shabab taysh

3andk 7a2 wallalhy ya memo thx 3ala radk ya <<<<<

thnxxxxx 3ala el mawdoooooo3

thanks ya engy 3ala rdk